升小一有咩跟進？

4月，陸陸續續收到client喺CAC嘅結果。雖然我唔係家長，但作為一個ST，望見評估結果冷冰冰幾行字，背負住大家幾年嚟嘅喜怒哀樂，同時指揮住小朋友未來嘅畢業去向，百般滋味在心頭，在所難免。言歸正傳，CAC？評估？又評？

係咁嘅，學前嘅小朋友喺升學前，會喺衛生署兒童體能智力測驗中心（CAC）再做一次評估，醫生會根據評出嚟嘅結果為家長作升學建議、轉介專科服務等。評估範疇一般包括智力/認知、語言、體能、文字學習能力、專注力、行為、社交、適應能力、情緒等各方面表現。醫生亦都會同家長面談、參考家長同幼稚園提供嘅資料，所以家長去之前都可以準備多少少有用嘅資訊俾醫生更全面了解小朋友嘅日常表現啊，例如平時一啲對話片段、習作簿、訓練進度報告等。

好啦，評完，揀好學校，咁之後呢？有咩跟進呢？相信好多家長都有呢個疑問，我就喺下面簡單咁解答吓大家啦！

1️⃣ 過咗6歲 + 重讀K.3...... ➡️ 冇得再接受社署嘅學前康復服務

🔸 如果言語治療師評估過覺得小朋友有需要，會經由CAC轉介至醫院言語治療部跟進。

🔸 如果冇轉介，6歲過後就會close file。

補充：有case係小朋友未過6歲但轉服務，例如陳小明4歲由S位轉去主流幼稚園重讀K.2，經言語治療師評估過覺得陳小明仍然需要接受言語治療嘅話，case會轉介至其他服務，如E位，咁陳小明就唔會斷咗服務，仍然可以繼續接受言語治療。

2️⃣ 升主流小學...... ➡️ 轉介至小學言語治療師跟進

🔹 經CAC評估後建議可入讀主流學校，包括有限智能、低下智能等。

🔹 如果小學認為小朋友智能未能應付校本課程，會建議小朋友去CAC做評估再作相應安排。

🔹 適用於官校、津校、私校、直資學校、國際學校。

3️⃣ 升特殊學校...... ➡️ 駐校言語治療師跟進 

🔸 經CAC評估後建議入讀特殊學校，包括智能障礙屬輕度、中度、嚴重 、極嚴重；肢體殘障等。

🔸 有case試過由特殊學校轉到主流小學，但為數唔多。

明白家長都會有好多顧慮，因為升學的確係一件重大嘅事，建議家長真係早啲了解吓唔同學校，包括學校有冇支援SEN學童、支援同配套又夠唔夠、日常功課量多定少、教學語言係咩......除此之外，需要時都可以聯絡社工查詢有關升學問題，一齊衡量唔同方案嘅利與弊。

最最最重要，都係要了解小朋友真正嘅需要，千祁唔好將入學表睇成家長嘅成績表，畢竟小朋友先係踏上呢條路嘅主角。

知多啲：🔍

🗣 兒童體能智力測驗中心(CAC) 資料：https://www.dhcas.gov.hk/tc/center_info.html

🗣 兒童體能智力測驗服務－－小一前升學跟進服務： https://www.dhcas.gov.hk/file/PP1_Ax_Pamphlet_for_parents_TC_230420.pdf